Овој документ за застапување го дели и поддржува ставот на Европската комисија, притоа аргументирајќи дека во овој процес, на Собранието, покрај институциите на системот, природен партнер им се и граѓанските организации. Дотолку повеќе, и Собранието и граѓанските организации ги претставуваат и застапуваат истите интереси – интересите на граѓаните на Северна Македонија.
Притоа, овој документ се фокусира на улогата на овие два важни актери во пристапниот процес на Северна Македонија застапувајќи:
1) институционализирана вклученост на граѓанските организации во пристапните преговори преку нивно учество во работата на Собранието во спроведување на неговата надзорна функција;
2) обезбедување транспарентност преку вклучување на јавноста и нејзино навремено информирање; и
3) проширување и насочување на спектарот - инструменти за финансиска поддршка за учеството на граѓанските организации во пристапните преговори од страна на Европската Унија и Владата.
