Во рамки на отворањето на филмската проекција свои обраќања имаа Н.Е. Петра Дрекслер, Амбасадорка на СР Германија, г. Горан Садикаријо, Извршен директор на Фондот на холокаустот на Евреите од Македонија и г. Даниел Браун, Официјален претставник на Фондацијата Конрад Аденауер.
Филмот ја прикажува средбата на водечките претставници на нацистичкиот режим од СС, Канцеларијата на Рајхот, полицијата и администрацијата утрото на 20 јануари 1942 г. во вила на езерото Ванзе во близина на Берлин. Единствената тема на агендата тоа утро беше она што нацистите го нарекоа "Конечно решение на еврејското прашање": организација на систематско масовно убиство на милиони Евреи низ Европа. Филмот му дава на гледачот увид во шокантната „нормалност“ што се прикажува за време на состанокот додека се разговара за процедурите, организацијата и координацијата, како и за одговорностите за убиството на милиони луѓе како да е тоа секојдневен административен акт.
Настанот се одржа во рамки на одбележувањето на трагичните настани од 08 и 09 ноември 1938 г. кога во цела Германија и делови од Австрија се случи акт на масовно прогонување на Евреите познат како Кристална ноќ или Ноќ на скршеното стакло.