Mediat dhe informimi i qytetarëve në kohën e koronavirusit

Situata e krijuar në Shqipëri nga epidemia e koronavirusit dhe nga masat e marra për parandalimin e tij ka qenë me pasoja edhe për mediat shqiptare. Një pjesë e mirë e mediave shqiptare po përballen me probleme të rënda ekonomike, mbyllja e aktivitetit të bizneseve ka pasur si pasojë mungesën e reklamave të tyre në media, gjë që ka sjellë një krizë financiare. Por, ky nuk është i vetmi problem me të cilin po përballen mediat. Përpjekjet e qeverisë për ta përdorur situatën e krijuar nga koronavirusi për të ndërmarrë masa shtrënguese që cënojnë parimet dhe standartet e demokracisë shihen me shqetësim shumë të madh.